A IGUALDADE NON TEN TRUCO

Grazas á ANPA, onte, a compañía viguesa "Magia en la manga" veu ao noso colexio para representar o seu espectáculo: "A igualdade non ten truco". Durante o mesmo, ademais dos seus divertidos trucos de maxia con cartas, cordas, panos, dragóns e espadas, entre outros, tamén fixeron un percorrido  pola historia das mulleres magas para amosar que ainda que estamos máis afeitos a ver magos, tamén existiron e existen hoxe en día, moitas mulleres magas.

O mago, Carlos Tomico Pérez e a maga, Sara Rodríguez Martínez, transmitíronnos unha mensaxe moi importante: e é que todas e todos podemos desenvolver calquera profesión.

Que ben o pasamos!

O UNIVERSO

 En ciencias xa comezamos co tema do Universo. Falamos de estrelas e constelacións, dos planetas, da Lúa ... Para seguir aprendendo, poderemos buscar información en Internet, nos libros que trouxo Xandre, nos da biblio e da clase ...

Ademais para que todo nos quede moi clariño, faremos unha maqueta do Sistema Solar, un calendario lunar, un modelo de eclipse ...

Polo de pronto, xa comezamos a pintar a base da maqueta:

VOLUNTARIADO BIBLIOTECA

 Como xa imos en quinto, este ano podemos ser voluntari@s da biblioteca. A tarefa dos voluntari@s consiste en ir a buscar aos nenos de infantil para ir á biblioteca, axudarlles a coller libros, facer os empréstitos, catalogar, colocar os libros nos anaqueis por orde alfabética ...

Por iso, hoxe a profe Rosa, que é a coordinadora do equipo de Biblioteca deunos unha pequena formación para aprender como tiñamos que facer os empréstitos co programa Koha, como están catalogados os libros, ...

Gustounos tanto que... case tod@s nos apuntamos ao voluntariado!!!!

OS NOSOS ANIVERSARIOS

Este curso, seguindo unha idea da titora de sexto, Carmen, decidimos celebrar os cumples da clase dun xeito diferente.

Nos primeiros días de clase, cada un, decoramos un sobre co noso nome e o día do mes do noso aniversario e nel, metimos un papel no que eleximos a maneira na que queriamos celebralo sempre e cando fose algo que non supuxese gasto económico e que necesitase material que tivésemos no cole ou na casa.

Estes eran algúns exemplos que podiamos elexir:

Hoxe xa comezamos coa celebración do cumple de Álex que elexiu: unha sesión de xogo libre na clase!

PREPARANDO O HORTO

 O venres pasado, recibimos no cole a visita de Pablo Iglesias, un experto en cultivos ecosostibles que xa nos acompañou o curso anterior, para axudarnos a poñer en condicións o noso invernadoiro para este novo curso. E sabedes que? Este ano, tócanos compartir o tempo de horto cos nosos compañeir@s de ciclo.

Durante preto dunha hora, recollimos follas e paus para poñer arredor do invernadoiro pola parte exterior para facer casiñas para os insectos de xeito natural, arrincamos malas herbas e tamén tivemos tempo para sementar.

Traballamos un montón!

CARTA DE MACÍN

 

Hoxe recibimos unha carta de Macín, a mascota da nosa biblio. Martina Fernández foi a encargada de lela en alto para todos e todas:

Na carta, Macín dicíanos que a nosa biblioteca ampliouse con novos libros e xogos dos que poderemos disfrutar unha vez que estean catalogados.

Tamén nos pediu unha cousiña aproveitando que dentro de pouco celebraremos o Samagostín no cole: que entre todos inventáramos un conto de medo e o presentásemos en formato audiovisual! Menudo reto, non si? 

Así que despois do recreo, xunto cos nosos compañeiros e compañeiras de 6º de primaria, fomos a biblioteca un anaquiño para poder ver en directo as novas adquisicións.

Moi boas lecturas, para todos e todas!!!!!

NOVO CURSO 2025-2026

Arrinca o curso e dámoslle a benvida á nosa nova promoción de 20 estudantes de 5º de Primaria, curiosos, valentes e con moitas gañas de aprender. 

Durante este curso viaxaremos á Galia para traballar coa temática de Astérix e Obélix e aprender creando e en equipo.

Se tedes cómics, libros ou materiais para prestar, serán benvidos! E se alguén quere vir a contar o seu "oficio romano" (arquitectura, historia, xornalismo, radio, astronomía, ...), escribídenos.

(Plantilla de @yanoteajunto)

 Como diría Abraracúrcix: "A aldea unida xamais será vencida!"

Que este curso sexa unha gran aventura.

Benvidos/as, galos e galas de 5º!

ATA PRONTO, CHIC@S!

O 10 de xuño celebramos a nosa cerimonia de graduación. Íamos coa barriga chea de nervios e cunha mestura fermosa de alegría e tristura. Uns días antes redactamos cada un, unha carta de agradecemento para o profesorado que nos acompañou desde Infantil ata Primaria. Ao lela, caéronnos máis ca unha bágoa pola emoción… tamén á profe, que estaba tan nerviosa coma nós.

A profe preparounos unha presentación moi agarimosa, cunha foto actual e outra de cando eramos pequenos/as. ¡Que barbaridade o que medramos! Ao remate, entregounos a orla e o diploma que acreditan o noso paso polo cole. Foi unha cerimonia moi emocionante!

Si que foi unha cerimonia moi emocionante, rapaces e rapazas. Na nova etapa que comezades, seguide sendo curiosos, valentes e boa xente. Non vos rindades aínda que sexa difícil. O cole seguirá sendo a vosa casa: cando queirades, volvede a contarnos como vos vai. Unha gran aperta.

TEATRO: "A VISITA DA INSPECTORA"

Polo día do teatro, o alumnado de quinto e sexto de primaria representamos dúas obriñas de teatro.

Nós, representamos, "A visita da inspectora", unha adaptación da obra "A visita do inspector" de Fina Casalderrey.

Aquí vos deixamos algunha fotiño da representación:

AO CINE COS NOSOS AFILLADOS II

 Hoxe voltamos a ter sesión de cine na biblioteca, pero esta vez foi cos nosos afillados e afilladas de Educación Infantil.

Durante preto dunha hora, compartimos con eles, diversas curtametraxes de educación en valores.

Pasámolo moi beeeeeen! Ollade que atentos estabamos tod@s:

AO CINE COS NOSOS AFILLADOS

 Dentro das actividades propostas pola coordinadora de benestar e convivencia para propiciar a mellora de convivencia, a resolución pacífica de conflitos e o respecto aos compañeiros e compañeiras entre outros,  xunto cos nosos apadriñados de cuarto de primaria, hai uns días, fomos á biblioteca a ver a película "Kárate Kid".

E hoxe, volvímonos a xuntar, para reflexionar e facer unha posta en común sobre a película.

OBRADOIRO SOBRE MICROMACHISMOS

Co gallo do día da muller, dentro do programa "Neda, pola igualdade real", tivemos no cole un obradoiro sobre micromachismos,é dicir, todos eses pequenos xestos e expresións sexistas que contribúen a perpetuar os roles de xénero. 

Durante preto dunha hora, a través de diferentes dinámicas, falamos de conceptos como machismo, feminismo, estereotipos e igualdade; cubrimos unha enquisa e posteriormente comentamos os resultados, analizamos as letras dalgunhas cancións de moda, moitas das cales son machistas e fixemos un rol playing.

Como agasallo de despedida, deixáronnos unha caixa violeta, para meter nela todo o que observemos relacionado cos micromachismos.