CHARLA FRAGAS DO EUME

 

Hoxe, grazas ao Centro de Extensión Universitaria e Divulgación Ambiental de Galicia (CEIDA) que conta co apoio da Deputación da Coruña, tivemos unha charla sobre o parque natural das Fragas do Eume co obxecto de coñecer a importancia e o valor que ten.

Durante preto dunha hora coñecimos a flora e a fauna da Fraga, as especies que están ameazadas, algunhas especies invasoras, o seu patrimonio etnográfico e histórico e tamén os principais problemas ambientais que sofre e como entre tod@s podemos axudar a protexela.

Proximamente, faremos unha ruta guiada polas Fragas para poder ver en vivo e en directo moitas das cousas que aprendimos durante a charla.

IMOS DE EXCURSIÓN

 Hoxe fomos de excursión á Coruña. Primeiro visitamos a Casa das Ciencias. Comezamos vendo a película "Polaris" coa que aprendimos o misterio das noites polares. Aquí vos deixamos o tráiler oficial da película:

E despois de andar todas as salas investigando todo o que por alí había, marchámonos para o Domus, o primeiro museo interactivo do mundo adicado integramente ao ser humano.

Alí vimos outra película, esta vez relacionada co futuro do planeta Terra e nos divertimos coas diferentes actividades: realizar debuxos seguindo as instrucións dun compañeiro/a, xogar a un xogo que mide a actividade cerebral, probar o reflexos, saber cal é a velocidade do noso penalti, ...

Podes premer na imaxe para ver algunhas das fotos da xornada.

DE EXCURSIÓN POLA COSTA DE DEXO

Hoxe fixemos unha visita guiada pola Reserva da Biosfera das mariñas Coruñesas e Terras do Mandeo, concretamente polo Monumento Natural da Costa de Dexo.

Tivemos moi mala sorte porque nos choveu todo o tempo, por iso a saída foi máis curta do esperado e quedáronnos moitas cousas por ver.

Tamén vimos a Illa da Marola, onde aniña o paxaro mariño máis pequeno, o paíño do mal tempo, un paxaro de apenas 28 gramos que vive na auga e no aire xa que só pousa na terra para aniñar ou para refuxiarse cando hai fortes temporais.

A que se vos parece esta illa?

EXCURSIÓN Á LONXA DE BARALLOBRE

 

Hoxe visitamos a lonxa de Barallobre. Primeiro vimos unha presentación para coñecer as diferentes especies de moluscos que se recollen na zona. Despois fixemos un tour polas instalacións no que nos amosaron o percorrido que fai o marisco dende que chega á lonxa, se depura e está listo para a venda.

Finalmente, fomos á ribeira para coñecer como traballan os/as maricadores/as a pé.

Aprendimos moitísimo!!!!!!

TALLERES TECNOLAB E A QUÍMICA E A COSMÉTICA

 

Fonte da imaxe

Hoxe os nenos e nenas de quinto e sexto de primaria fomos ao CIS Tecnoloxía e Deseño un organismo que pertence a Axencia Galega de Innovación para facer dous talleres.

Os de quinto comezamos co taller de TECNOLAB. Alí aprendimos moitas cousas sobre electrónica e placas programables educativas como Microbit. Primeiro aprendimos a programar un saúdo na placa, a controlar luces e sinais inalámbricas e para finalizar nos enfrontamos ao reto de construir un sistema de alarma que resistise a instrusión.

O segundo taller foi sobre A QUÍMICA E A COSMÉTICA. Na primeira parte aprendimos dun xeito divertido as principais características da materia e a súa estructura interna: os átomos, os estados da materia e os cambios de estado :

a) Descubrimos que non todos os gases pesan o mesmo a través de demostracións con helio para comprobar a súa lixereza e estabilidade e mesturando bicarbonato e vinagre para xenerar dióxido de carbono co que podemos apagar velas de xeito case máxico, démonos conta de que os gases son invisibles utilizando un bazooka de aire e unha máquina de fume )

b) Observamos distintas propiedades dos líquidos como o PH e a densidade: calculamos distintos pH e creamos unha columna de densidades .

c) Aprendimos as principais características dos sólidos.

d) Vimos demostraciones "máxicas" con reactivos como a nitrocelulosa.

e) Por último elaboramos unas bombas de baño para descubrir a importancia da química en cousas tan cotiás como os cosméticos.

Fai clic na imaxe para ver algunhas fotos da xornada:

 

No marco da iniciativa "Ler conta moito" da Rede de bibliotecas públicas de Galicia, esta semana o concello de Neda activou o programa "Do cole á biblio" unha iniciativa que contou cun total de tres espectáculos de animación á lectura que tiveron lugar na Casa da Cultura.

A nós tocounos o espectáculo "Unha maxia diferente" a cargo do Mago Paco. Nel, a través de distintas historia e xogos de maxia, póñense de manifesto as diferencias humanas e trabállase a igualdade desde un punto de vista divertido e ilusionante e sen perder o transfondo educativo, tal e como di na súa páxina.

Pasámolo fenomenal

VISITAMOS FP INNOVA EN SANTIAGO

Hoxe asistimos á quinta edición do congreso de FP Innova. Durante a visita vimos as investigacións e innovacións que se están a facer nos centros de formación profesional de Galicia así como puidemos experimentar en primeira persoa a realidade virtual e aumentada ou a impresión dixital entre outros.

COÑECEMOS A FÁBRICA TEXTIL DE XUBIA

Este martes, acompañados dos nosos compañeiros e compañeiras de 4º e 5º de Primaria, fixemos unha visita guiada á Fábrica de Xubia. Esta visita está promovida polo Concello de Neda dentro do seu programa:  "Educando en patrimonio e historia" .

Durante a visita, o xerente da firma Galicia Textil, falounos do proceso artesanal de elaboración dos tecidos así como da historia das instalacións que teñen máis de 200 anos.

Sabiades que a factoría foi inicialmente Fábrica Nacional de Moeda e Timbre, fábrica de construccións de fusís e tamén de chapas de cobre coas que se recubrían o entramado dos barcos de madeira para mellorar a súa navegabilidade? 

E que cada día se elaboran 7000 m de tea?  Estas teas, almacénanse e expórtanse a outras factorías. Para facelas, enrólase o fío no urdidor, dalí pasa á encoladora e por último á remetadora onde se deseña a estrutura do tecido.

ROTEIRO MEDIOAMBIENTAL POLA COSTA DE DEXO

 

Hoxe fixemos unha ruta guiada pola Reserva de Biosfera Mariñas Coruñesas e Terras de Mandeo concretamente pola Costa de Dexo da man unha vez máis da asociación CEIDA (Centro de Extensión Universitaria e Divulgación Ambiental de Galicia)..

Durante o percorrido, aprendimos a importancia e o valor natural e social deste espazo. Entre outras moitas cousas,  vimos a Illa de A Marola que é un importante refuxio para algunhas aves como o Paíño do mal tempo unha das aves mariñas máis pequenas que existen.  A nós , a illa se nos parece a unha muller acostada, a unha tartaruga, á metade dunha cenoria,... E a vós? A que se vos parece?

 As Furnas que son unhas cavidades mariñas  formadas pola acción do mar:

 E a Punta do Seixo Branco que debe o seu nome a unha gran veta de cuarzo branco que serpentea o cantil hacia o mar :

Aquí vos deixamos todas as fotos:

ROTEIRO CASTELO DE SANTA CRUZ

 

Despois da charla da semana pasada da asociación CEIDA sobre espazos naturais protexidos da provincia de A Coruña, hoxe tocounos ver en vivo e en directo moitas das cousiñas que nos dixo Ángel. 

- Paseamos polo xardín das árbores centenarias, sabiades que as follas e sementes do texo son moi velenosas pero que delas se obtén unha substancia que se emprega para tratar algúns cancros como o de mama?, 

- Percorrimos os límites da illa para ver distintas especies vexetais como a herba de namorar e algúns  animais como rás, corvos mariños,... Coñecimos a curiosa historia dunha pardela cincenta que no ano 1985 se achegou a descansar a un coñecido hotel do paseo marítimo. A pardela, que incluso se deixaba acariciar, pasaba todas as noites neste hotel ou no paseo e ao finalizar o verán se marchaba. Así estivo durante quince longos anos.

- Descubrimos a cuádriple utilidade desta illa:

•  Defensa militar porque o castelo se construíu para reforzar a fortificación da ría fronte aos ataques do corsario Francis Drake.
•  Defensa cultural porque unha vez abandoado, o castelo foi comprado e convertido en pazo por Xosé Quiroga (por un precio equivalente a unha parella de bois) , marido da escritora Emilia Pardo Bazán e alí a escritora escribiu algúns dos seus mellores libros.
• Defensa da infancia porque en 1939, Blanca Quiroga, filla da escritoria dona o pazo á armada de cabalería para adicalo a casa de verán de orfos da Guerra Civil.

E por último e non menos importante,

• Defensa  do medio ambiente porque desde a década dos oitenta, nel atópase o Centro de Educación, Información e Divulgación Ambiental de Galicia (CEIDA).

Aquí vos deixamos algunhas fotos da xornada:

TRANVÍAS FERROL-NEDA

Este xoves, os nenos e nenas de quinto e sexto de primaria, baixamos andando á Casa das Palmeiras, para ver a exposición de debuxos a color de Xulio Ferrín sobre a liña de tranvía Ferrol-Neda. A exposición consta de 26 láminas que ilustran a historia deste medio de transporte entre o ano 1924, cando botou a andar a primeira liña e 1961 data da súa derradeira viaxe.

Gustounos moitísimo!

IMOS AO TEATRO

 

Os nenos e nenas de quinto e sexto de primaria fomos hoxe ao teatro ao Pazo da Cultura de Narón a ver a obra "Rosalía" do grupo  Culturactiva.

A obra trataba da vida de Rosalía de Castro cando era nena antes de convertirse na gran escritora que foi.

Imaxe:https://www.culturactiva.org/es/espectaculo/rosalia

Aquí vos deixamos un trailer da mesma:

VISITAMOS AS FRAGAS DO EUME

Hoxe por fin visitamos as Fragas do Eume. Primeiro fixemos unha ruta circular polo río . Durante a mesma puidemos disfrutar da bonita paisaxe, da flora (os fentos xigantes e os máis pequenos, castiñeiros, carballos, ...) e tamén da fauna (o caracol de Quimper que ten a cuncha plana, unha pequena rá, eirugas, opilion - araña de patas longas-, ...).

Despois dun pequeno descanso para merendar, visitamos o que queda do Mosteiro de Caaveiro do século X.II, e grazas ao guía do mesmo e ao noso monitor Ángel, aprendemos moitas cousas sobre el.

Queredes ver algunhas fotos da saída?

CHARLA SOBRE AS FRAGAS DO EUME

 Hoxe os nenos e nenas de quinto e sexto de EP tivemos unha charla a cargo de Ángel Prieto que traballa para a asociación CEIDA (Centro de Extensión Universitaria e Divulgación Ambiental de Galicia). Esta asociación tal e como eles anuncian na súa páxina, "promove a educación ambiental así como o intercambio científico e cultura, traballando na procura de solucións aos problemas ambientais e fomentando as boas prácticas cidadás neste eido".

Ángel, a través dunha pequeña presentación, falounos de xeito sinxelo e ameno das características dun espazo natural protexido que temos preto de nós, "As fragas do Eume" e tamén dalgunhas medidas que podemos tomar nós para preservalo.

A vindeira semana veremos en vivo e en directo moitas das plantas e dos animais que nos amosou Ángel na presentación. Estamos desexando ir.

O RÍO BELELLE AO NATURAL

O profesor Lois Anxo Rodríguez que é o autor dunha guía titulada "O río Belelle ao natural" veu hoxe ao noso centro.

Primeiro deunos unha charla sobre o ecosistema do río:

Ao finalizar, agasallounos cun exemplar da súa guía e non só iso senón que tamén nolo asinou a tod@s:

 Pero a cousa non quedou aí. A continuación levounos ao río onde nos convertimos en científicos por un día. 

Primeiro baixamos á beira do Belelle e alí coa axuda de Lois, collimos distintos invertebrados. Despois utilizamos estes invertebrados como bioindicadores para analizar a calidade das augas do río, e sabedes que? Pois resultou que as augas do noso río son excelentes.

Tamén dimos un pequeno paseo no que collimos follas das árbores próximas ao río. Había moitísimas: carballos, ameneiros, freixos, abeleiras, salgueiros, ... Coa axuda da guía, identificamos todas as follas e tamén as clasificamos. Lois contounos que antes coa madeira desas arbores facíanse zocas e tamén pezas para os carros. Aquí vos deixamos unha pequena mostra das fotos que sacamos:

PASÁMOLO FENOMENAL!

IMOS AO CINE

Hoxe todo o centro fomos aos cines ODEÓN nunha saída organizada pola ANPA. Desde Educación Infantil ata 2º de Educación Primaria viron a película "Cómo entrenar a tu dragón 3" e de cuarto a sexto fomos ver "Capitana Marvel". Aquí vos deixamos o trailer oficial da película:

Pasámolo moi ben!

EXCURSIÓN A CORUÑA

O venres pasado, o alumnado de terceiro, cuarto e quinto de primaria,  fomos de excursión a Coruña. Pola mañá visitamos o Centro de Intepretación da Torre de Hércules e subimos á Torre. Desde alí había unha vista preciosa! Tamén fomos ao MUNCYT (Museo da Ciencia e da Tecnoloxía) onde ademais de ver o museo fixemos un taller de química.
Xa despois de comer visitamos o Acuario. Vimos as focas, ao tiburón Gastón e moitísimas especies mariñas. Aquí vos deixamos unha presentación de fotos da saída:

VISITAMOS ALVEDRO

O pasado 14 de decembro, os alumnos e alumnas de quinto e sexto, acompañados dos nosos compañeir@s de 1ºe 2º visitamos o parque de bombeiros do aeroporto de Alvedro en A Coruña. Foi moi divertido e aprendimos moitas cousas.

Podedes ver máis fotos da saída na páxina web do cole ou clicando no enlace de abaixo:

VISITA AOS BOMBEIROS

VISITAMOS O BELÉN

Pola mañá fomos ao Belén da Casa das Palmeiras en Neda, unha excursión organizada pola ANPA do centro. A nós tocounos ir no segundo turno xunto cos nosos compañeiros e compañeiras de segundo, terceiro, cuarto e quinto.

SAÍDA AO PORTO DE MUGARDOS E Á PRAIA DA MAGDALENA

O venres 8, fixemos a saída que tiñamos pendente dentro do proxecto "Ondas de ilusión: Escolas do mar". Primeiro fomos ao porto de Mugardos e a continuación á praia da Magdalena en Cabañas para facer unha limpeza da mesma.
Como podedes ver na foto, fixemos un gran traballo, non si?